నూతన తెనుగు సంవత్సర శుభాకాంక్షలు

ఉగాది శుభాకాంక్షలు

డాక్టర్. చిలకమర్తి దుర్గాప్రసాదరావు

ఉత్పలమాల:

అంత వసంతమొప్పె నుదయాచలమందరుణుండు ప్రాచ్యది

క్కాంతనవారవిందమున క్రాలెడు కుంకుమ రీతి దోచె శా

కుంతములెల్లవీడె తమ గూండ్ల కొలంకులు తాము పద్మినీ

కాంతుని బిల్చురీతి నును గాడ్పుల బంపె కరంబు వేడ్కతోన్.

ఉత్పలమాల:

భూవలయంబులోని నలుపుం దొలగించెను స్వీయకాంతి ధా

రావళి చీకటుల్గిరి గుహాలయసీమలకేగె మేఘముల్

ఆవిరియయ్యె గాన వినయంబున కాకకులంబు సూర్యునిం

గావు మటంచు వేడుకొనెనా! యను భాతిగ 'కావు కావ'నెన్

సీసము:

భూలోకజనపాపపుణ్యముల్దెలియ శ్రీ

పతిపంప వచ్చిన ప్రతినిధియన

మైనాకుగననేగి మఱలెడు హిమశైల

రాత్సుతాధృతశిరోరత్నమనగ

పాతాలలోకాధిపతి శంభునర్చింప

గైకొన్న సౌవర్ణకలశమనగ

విరహిణీజనతాపహరణార్థమై వైద్య

గురువొసంగెడు రత్నగుళికయనగ

తేటగీతి: వారినిధిలోననున్న బంగారముబడ

బానలంబున కఱగి ముద్దయ్యెననగ

రమ్యమైనట్టి రత్నదర్పణము రీతి

భానుడుదయించె దేదీప్యమానుడగుచు.

తేటగీతి:

అట్టి భానుండు సర్వలోకైక హితుడు

పావనంబగు విజయాఖ్యవత్సరమున

భూజనులనెల్ల నిత్యము బ్రోచుగాక

ఆయురారోగ్యభోగభాగ్యములొసంగి.

శ్రీశ్రీశ్రీశ్రీశ్రీశ్రీశ్రీశ్రీ