ఎంత విచిత్రం !

ఎంత విచిత్రం !

డాక్టర్. చిలకమర్తి దుర్గాప్రసాద రావు

ఓ శివా! సాధారణంగా మానవుడు అవసాన సమయంలో దేన్ని గురించి ధ్యానం చేస్తాడో దాన్నే పొందుతాడు అని నువ్వు  శ్రుతి,  స్మృతి , ఇతిహాస , పురాణాల ద్వారా ఎన్నోసార్లు చెప్పావు .  ‘యథా క్రతురస్మిన్ లోకే పురుషో భవతి తథేత: ప్రేత్య భవతి’ (ఛాందోగ్య ఉపనిషత్తు –III -14-1) అని ఒక ప్రక్క ఉపనిషత్తులు చెబుతుండగా “ యం యం వాపి స్మరన్ భావం త్యజత్యంతే కళేబరం తం తమేవేతి కౌంతేయ! సదా తద్భావభావిత:’(VIII-6) అని భగవద్గీత కూడ ఇదే విషయాన్ని నొక్కి చెబుతోంది . అంతేకాకుండ జడభరతుని  వంటి మహామునుల చరిత్రలు  ఈ విషయాన్నే ఋజువుచేస్తున్నాయి. కాని శివా ! ఇదేం చిత్రమయ్యా! నీ పాదద్వంద్వాన్ని ధ్యాన్నిస్తుంటే  ద్వైతభావం కలగాలి . కాని అందుకు భిన్నంగా శీతోష్ణ సుఖదు:ఖాది ద్వంద్వాతీతమైన  అద్వైతస్థితి  కలుగుతోంది. ఇది  చాల ఆశ్చర్యంగా ఉంది కదూ!.

 అంతే చింతయతే యత్తత్తామేతి చ త్వయా గదితం

శివ! తవ చరణద్వంద్వధ్యానాన్నిర్ద్వంద్వతా చిత్రం (3)

(శ్రీ అప్పయ్యదీక్షితుల-ఆర్యాశతకం)

శివ! = ఓ శివ 

అంతే =మరణ కాలమందు

యత్=ఏది

చింతయతే = ధ్యానము చేయునో

తత్=అది

తాం=అతనిని

ఏతి=పొందును (అని) 

 త్వయా చ =నీచేత కూడ

గదితం =చెప్పబడినది (నువ్వూ చెప్పేవు)

తవ =నీ

చరణ ద్వంద్వ= పాదద్వంద్వమును

ధ్యానాత్=ధ్యానము చేయుట వలన

నిర్ద్వంద్వతా= ద్వంద్వాతీత స్థితి  (సిద్ధిస్తో౦ది)

చిత్రం =ఇది చాల వింతగా ఉంది కదూ!

                                  ***