మినీ కవితలు-3

మినీ కవితలు-3

డా|| చిలకమర్తి  దుర్గాప్రసాదరావు

1 ‘అహం’- అన్నారు ఆదిశంకరులు

‘సోsహం’- అన్నారు రామానుజులు

‘దాసోsహం’- అన్నారు మధ్వాచార్యులు

అక్షరాలు పేర్చారు అర్థాలు మార్చారు

ఆ పేర్పు ఆ మార్పు  ఆ నేర్పు

అర్థం కావాలంటే  ఉండాలి కొంత ఓర్పు

ఉపనిషత్తులు చదవండి ఉత్తమగతులు పొందండి

                ***

2 . తడిపితే బిగుసుకుపోతాయ్  

    తలుపులు

    తడపకపోతే  బిగుసుకుపోతాయ్

    ఉద్యోగి తలపులు  

                 ***

3. నిరుద్యోగి కన్నా చిఱుద్యోగి మిన్న

   బోడిగుండు కన్నా బట్టబుర్ర మిన్న 

   ఖాళీగా కూర్చోడంకన్నా

   కాస్తంత ఉద్యోగం మిన్న  

          ***

4. అర్హతగల అధ్యాపకులొకచోట

   అర్హులైన విద్యార్థులు వేఱొక చోట

  అందమైన సేలరీలు ఒకచోట

  అడ్డమైన చాకిరీలు ఇంకొక చోట

  చదువుకున్న వాడి కన్న

  చదువుకొన్న వాడే మిన్నగా

 సరస్వతి సిగ్గుతో ఒదిగిపోతోంటే   

 లక్ష్మి చకచకా ఎదిగిపోతోంది

              ***  

5. పిల్లలు చెప్పుచేతల్లో లేకపోతే

   పెద్దల  చెప్పులు చేతుల్లోకే  

                ***

6. పరలోకపు ఆ  కల్పవృక్షాలకోసం

   ఇహలోకపు ఈ కలపవృక్షాల్ని నాశనం చేసుకోకు

   పరలోకపు ఆ సుఖసంపదలకోసం

   ఇహలోకపు ఈ  పశుసంపదను నాశనం చేసుకోకు .

   జ్ఞానంతో శోధిస్తే   యోగంతో సాధిస్తే

  అన్నీ నీకందుతాయ్ అందరికీ చెందుతాయ్ .       

                      ***