కలియుగదైవాలు “కాఫి-టీ”లు

కలియుగదైవాలు “కాఫి-టీ”లు

(వ్యంగ్య రచన)

చిలకమర్తి వేంకటసూర్యనారాయణ,

                      ఎర్రమిల్లి వారివీధి,గంటలమ్మ గుడివద్ద ,

నరసాపురం -534275

1.      సీసపద్యం:

 సూర్యోదయానికి షోకెంతజేసినా

                 ‘కాఫి’ లేనిదె ఘటము కదలబోదు

కార్యాలలోడబ్బు ఖర్చెంత పెట్టినా

               ‘కాఫి’ లేనిదె రాదు గౌరవంబు

ప్రేయసిపై నీవు ప్రేమెంత చూపినా   

                  ‘కాఫి’ లేనిదె రాదు కౌగలింప

దైవపూజలందు దాని సేవిoపమి

               కార్యమసలే పూర్తి కాదు సుమ్ము

తే|| గీ|| పితృశ్రాద్ధాలలో నైన  ప్రీతితోడ

          ‘కాఫి’ మున్ముందె సేవింప కలుగు ఫలము  

          సత్యమీయది  లేదిందు సందియంబు     

         ‘కాఫి’ లేకున్న శాంతి లోకాన సున్న

2.      కందము:

ఇలలో కాఫీ టీలను

    సలలితముగ గొల్వ సకల సౌఖ్యములబ్బున్

    కలదిoదు  నిజము గనుమా!

    కలియుగ దైవంబులరయ కాఫీ టీలే

౩. ఆటవెలది:

 ‘కాఫి’ యందు గల్గు గమ్మత్తదేమియో

 కొద్దొ గొప్పొ దాని గ్రోలకున్న

 ప్రాణములకు చలనభాగ్యంబు సున్నయౌ

కల్ల గాదు నిజము కలియుగాన

4.   కందము:

  ఘనమగు రోగము లెల్లను

     ననుమానంబేమి లేక ఆశ్చర్యముగా

     కనుమూసి గాoచులోపల

     కనపడ రానీయవమ్మ కాఫీమాతా !

5.   సీసం :

 కాఫీని గొలిచిన కారణంబునగదా

                     ఘనకవీoద్రుల కలము కదలె వేగ

    కాఫీని గొలిచిన కారణంబునగదా

                  గాంధితాతకు దక్కె ఘనవిజయము    

    కాఫీని గొలిచిన కారణంబునగదా

                     గాయకకంఠాలు కమ్మనయ్యె

   కాఫీని గొలిచిన కారణంబున గదా

                    అయ్యర్ల పాలయ్యె  నాదిలక్ష్మి

   ఆ||వె|| దీర్ఘవ్యాధి తోడ దిగులొంది  వ్యథ చెంది

             మూల్గుచున్న ముసలిమూక కైన

             కాఫి! కాఫి!  యంచు కంఠమారగ ( బిల్చి

              కొలువకున్న ముక్తి కలుగ బోదు

6.   సీసం:

మురళీధరుడు మున్ను మోహినీరూపాన

                   సురలకు సుధ విందు పరపు నాడు

వినతాసుతుడు  శౌర్యవిస్ఫూర్తి మీరగ        

                  అమృతంపు కలశతో నరుగునాడు

అంజనీతనయుండు నధికరయంబున                

                సంజీవిగిరి దెచ్చు సమయమందు

దశకంఠునుదరాన దాచిన భాoడమ్ము

               శ్రీరాముడస్త్రాన చెండునాడు

ఆ|| వె|| పట్టు సడలి పుడమి పడ్డ బిందువులన్ని

           దివ్యమైన యట్టి దీప్తి తోడ

           తమ్ము గొలచువారి దయతోడ బ్రోవంగ

           కలియుగాన నిల్చె ‘కాఫి-టీ’ ల్గ

******