ఇలాగ చెయ్యి నాన్నా

ఇలాగ చెయ్యి నాన్నా

డాక్టర్. చిలకమర్తి దుర్గాప్రసాద రావు

ఒక అవధానంలో ఒక సమస్య ఇచ్చారు. అదేంటంటే "అంభోధి: జలధి: పయోధి: ఉదధి: వారాన్నిధి: వారిధి:”అని. అది అసలు సమస్యే కాదు. ఎందుకంటే అందులోఉన్న ఆఱు పదాలకు ఒకటే అర్థం . సముద్రం . ఇది సమస్య కాకపోవడమే అవధానికి ఒక పెద్ద   సమస్య అయింది. దీంతో ఆయనకు రెండుసమస్యలెదురయాయి. ఒకటి దాన్ని సమస్యగ పరిగణించడం, రెండు ఆ సమస్యను పరిష్కరించడం . కొంతసేపు ఆలోచించాడు. వెంటనే అందుకున్నాడు.

కుమారస్వామి తన తండ్రియైన పరమశివుని దగ్గఱకెళ్లాడు. ఏరా! ఎందు కొచ్చావు. పనేంటి అన్నాడాయన . నాన్నా! అమ్మకి కోపం వచ్చింది. నీ నెత్తి మీదున్న గంగను వెంటనే విడిచిపెట్టెయ్యి అన్నాడు. పార్వతికి ఎందుకు కోపమొచ్చిందో శివుడికర్థమయ్యింది. గంగ పార్వతికి సవతి కదా అందుకే అయి ఉంటుంది అనుకున్నాడు. సరే లేరా! ఆవిడ ఎప్పటి నుంచో నానెత్తి మీద కూర్చుంది. ఇప్పుడు ఎక్కడ వదలాలి? ఎలా వదలాలి? నువ్వే చెప్పు అన్నాడు. వెంటనే కోపంతోను ఆవేశంతోను కుమారస్వామి ఆఱు ముఖాలు ఒకసారే 'అంభోధి', 'జలధి', 'పయోధి' , 'ఉదధి', 'వారాన్నిధి', 'వారిధి', ఇలా వివిధ పదాలతో ఒకేఅర్థం వచ్చేలాగ "సముద్రంలో వదిలెయ్యి నాన్నా!" అని సమాధానం చెప్పాయట. ఎంత అధ్భుతమైన కల్పన . శ్లోకం చదవండి మరి.

అంబా కుప్యతి తాత!మూర్ధ్ని విధృతా గంగేయ ముత్సృజ్యతాం

విద్వన్ షణ్ముఖ!కాగతిర్మమ చిరం మూర్ధ్ని స్థితాయా: వద

కోపావేశవశాదశేషవదనై: ప్రత్యుత్తరం దత్తవాన్

అంభోధిర్జలధి:పయోధిరుదధిర్వారాన్నిధిర్వారిధి:

--_

వాయువ్యాస్త్రం ౨

వాయువ్యాస్త్రం ౨

డాక్టర్ . చిలకమర్తి దుర్గాప్రసాద రావు

మానవుడు ప్రయోగించిన వాయువ్యాస్త్రం మనకే పరిమితం . ఇక రాక్షసులు ప్రయోగిస్తే ఏమౌతుందో తెలుసుకోవాలంటే శ్రద్ధగా చదవండి.

రావణాసురుని తమ్ముడు కుంభకర్ణుడు. ఆయనకు ఆఱు నెలలు నిద్ర ఆఱు నెలలు తిండి. ఇది మనందరికి తెలిసిన విషయమే. కాని ఆయన అస్త్రాలన్నీ నిద్రలోనే సంధిస్తాడు. ఆయనకే తెలీదు ఎప్పుడు సంధిస్తాడో. అందువల్ల అందరూ చాల జాగ్రత్త పడతారు. జాగ్రత్తగా ఉండమని సమస్త లోకాలకు చాటింపు కూడ వేస్తారు. దీని ప్రభావం మానవలోకానికే పరిమితం కాదు. పదునాలుగు లోకాలలోను ప్రభావం చూపిస్తుంది. క్రింద అతల, వితల, సుతల, తలాతల, రసాతల, మహాతల, పాతాల లోకాలు. పైన భూలోక, భువర్లోక, స్వర్లోక ,మహాలోక ,జనోలోక,తపోలోక సత్యలోకాలు ఉన్నాయని మన విశ్వాసం. మొత్తం కలసి పదునాలుగు. ఆయన ప్రయోగించబోయే అస్త్రానికి ముందుగా వేసిన చాటింపు ఎంత ఇంపుగా ఉందో మీదే స్వయంగా చూడండి.

పదునాల్గు లోకాల్లో ఉండే సమస్త మహాజనులార! నిద్రపోతున్న కుంభకర్ణుడు అపానవాయువు విడిచిపెడుతున్నాడు. అది భయంకరమైన శబ్దం చేస్తూ భరింపరాని వాసనతో వెలువడేలా ఉంది. అందువల్ల మీరు వెంటనే మీ రెండు చేతులతో చెవి రంధ్రాలను గట్టిగా మూసేసుకోండి. ఓ సప్తకులపర్వతాల్లారా! మీరు భూమిపై గట్టిగా నిలదొక్కుకుని ఉండండి. లేకపోతే బంతుల్లా ఎగిరిపోయే ప్రమాదం ఉంది. ఓ రావణాసురుడా! నువ్వు వెంటనే గుడ్డలతో నీ పది ముక్కులలోని ఇరువది రంధ్రాలను నీ ఇరువది చేతులతో గట్టిగా మూసేసుకో. లేకపోతే నీ పని ఠా. ప్రకటన మీరే స్వయంగా చదువుకుని జాగ్రత్తపడండి.

రేరే లోకా: ! కురుధ్వం శ్రవణ పుటపిధానం ద్రుతం హస్తయుగ్మై:

శైలా: సర్వేSపి యూయంభవత గురుతరా: సావధానా: ధరిత్ర్యాం

శీఘ్రం రే రావణ! త్వం విరచయ వసనైర్నాసికానాం పిధానం

సుప్తోSయం కుంభకర్ణ: కటురవవికటం శర్ఘతే దీర్ఘముచ్చై:

(సుభాషిత రత్నభాండాగారం /౩౬౫/౫౬.)

వాయువ్యాస్త్రం ౧

వాయువ్యాస్త్రం ౧

డాక్టర్. చిలకమర్తి దుర్గాప్రసాద రావు.

భోపాల్ గ్యాస్ ట్రేజిడీ అందరికి తెలిసిన విషయమే. కాని హ్యూమన్ గ్యాస్ కామెడి చాల మందికి తెలీదు. తెలుసుకోవాలంటే చదవండి . విషవాయువు జనాల్ని ఒకే ఒక్కసారి చంపుతుంది. కాని మానవబాంబు అంటే మనుషులనుండి వెలువడిన వాయువు చంపదు గాని పదే పదే చంపినంత పని చేస్తుంది. ఒక స్కూల్లో టీచరు విద్యార్థిని అన్ని వాయువుల్లో ప్రమాదకరమైన వాయువేదిరా అనడిగారు. దానికి సమాధానంగా అపానవాయువు సార్ నేనెప్పుడు మా తాతయ్య గదిలోనే ఉంటాను. అందువల్ల అనుభవంతో చెబుతున్నాను అన్నాడు వాడు . పాపం టీచరు కూడ ఎందుకో కాదనలేకపోయారు. ఆ విషయం అలా ఉంచుదాం

ఇంటికి ఇనుము బలం మనిషికి మినుము బలం అన్నారు పెద్దలు. మినుము బలమేగాని అరగకపోతే ప్రమాదం తెచ్చి పెడుతుంది. ఒక మఠం . ఆమఠంలో ఒక యోగి ఉన్నారు. ఒకరోజున ఆయన మోతాదు మించి మినుపగారెలు తిన్నారు. అవెందుకోఅరగ లేదు. ఆ విషయం ఆయనకు తెలియ లేదు. యథాప్రకారం శిష్యులకు పాఠం చెప్పడానికి కూర్చున్నారు . పాఠ ప్రవచనం జరుగుతోంది. మధ్యలో ఫట్ఫట్ , ఫటా ఫట్'అంటూ పెద్ద శబ్దం వెలువడింది. అక్కడున్న పక్షులన్నీ ఆ శబ్దం విని భయపడి ఎగిరిపోయాయి. మంచినీళ్లకుండలన్నీ పగిలిపోయాయి.. గోడలన్నీ కదిలిపోయాయి. శిష్యులందరు పాఱిపోయారు. వాళ్లల్లో కొంతమంది అర్భకులున్నారు. వాల్లందరు క్రింద పడిపోయారు. ఇంత గందరగోళం జరిగింది. అప్పటిదాక ప్రశాతంగా ఉన్న ఆశ్రమవాతావరణమంతా చెల్లాచెదురైపోయింది. ఈ విషయం ఈ క్రింది శ్లోకంలో ఉంది. చదవండి.

జగ్ధ్వా మాషమయాన పూపవటకానా ధ్మాయ మానోదరే

ఫట్ఫట్ఫాడితి పాయవీయ పవనం యోగేశ్వరే ముంచతి

ఉడ్డీనం విహగైర్ఘటైర్విఘటితం దోలాయితం భిత్తిభి:

శిష్యైర్ధావితమర్భకైర్నిపతితం కోలాహలోSభూన్మఠే.

(సుభాషిత రత్నభాండాగారం /౩౬౫/౫౮)-

అన్నీ ఆయనే

అన్నీ ఆయనే

డాక్టర్ . చిలకమర్తి దుర్గాప్రసాద రావు

3/106, ప్రేమ నగర్, దయాల్ బాగ్ , ఆగ్రా

09897959425

dr.cdprao@gmail.com

శివపార్వతుల వివాహం జరుగుతోంది. శుభముహూర్తానికి ముందు పెండ్లికుమార్తె వైపు ఏడుతరాలు పెండ్లికుమారునివైపు ఏడుతరాలు కీర్తిస్తూ ఏకరువు పెట్టడం సాంప్రదాయం . కనీసం మూడుతరాలవారినైనా అంటే తండ్రి, తాత, ముత్తాతలనైన కీర్తించడం ఆనవాయితీగా వస్తున్న విషయమే. ఇక శివపార్వతుల వివాహమంటే సామాన్యమైన విషయమేమీకాదు . అపూర్వం అసదృశం. శివ పార్వతుల పెళ్లి కుదర్చడానికి వచ్చిన సప్తర్షులలో ఒకరైన అంగిరసుడు హిమవంతునితో ' ఓ హిమవంతుడా! పర్వతరాజువైన నీవు కన్యాదాతవు. నీ కుమార్తె పార్వతి వధువు. ముల్లోకాలకు ప్రభువైన ఈశ్వరుడు వరుడు. సప్తర్షులమైన మేము పెండ్లి పెద్దలం. నీ ఔన్నత్యానికి ఇంతకంటే ఏం కావాలయ్యా అంటాడు. పెళ్లికి వచ్చిన బంధువులు మిత్రులు సాక్షాత్తు ఇంద్రాది దేవతలు. పెండ్లి చేయిస్తున్న బ్రహ్మ ఎవరో కాదు స్వయంగా చతుర్ముఖ బ్రహ్మయే.

అంతా బాగానే ఉంది . పెళ్లి జరుగుతోంది. పార్వతి వైపు నున్న పురోహితుడు శివునితో నీ తండ్రి ఎవరు ? తాత ఎవరు ? ముత్తాత ఎవరో చెప్పునాయనా ! వాళ్లందరి పేర్లు ఏకరువు పెట్టాలి కదా! అని ఆడిగాడు. కాని శివుడు ఏమని చెబుతాడు . ఆయన పుట్టుక లేనివాడు . ఆదిమధ్యాంతరహితుడు. అసలు తండ్రి ఉంటే గదా తాత పేరు తెలియడానికి. తాత ఉంటే గదా ముత్తాత పేరు తెలియడానికి. అందుకని ఏమీ సమాధానం చెప్పలేకపోయాడు. సిగ్గుతో తలొంచుకోక తప్పలేదు . పరాత్పరుడై ఉండి కూడ మౌనంగా ఉండిపోయాడు. శివుని ముఖ కవళికలు గమనించిన బ్రహ్మ వెంటనే అందుకున్నాడు. “ అందఱు వినండి . ఆయనది హర కులం. ముందుగా వేద కంఠుడు మఱియు ఉగ్రకంఠుడు. ఆపై శ్రీకంఠుడు. ఆ తరువాత నీలకంఠుడు. ఇది ఆయన వంశవృక్షం" అని చెప్పగానే అందఱు ఆశ్చర్యచకితులయ్యారు. అందఱిలో తన గౌరవం కాపాడిన బ్రహ్మ వంక చూస్తూ చిఱునవ్వు చిందించిన చంద్ర శేఖరుడు మనందఱిని రక్షించుగాక.

తాతం తత్తాతతాతం కథయ హరకులే S లంకృతే సంప్రదానే

తచ్ఛ్రుత్వా చంద్రమౌళి: నతముఖకమల: జాతలజ్జో బభూవ

బ్రహ్మాSవాదీత్తదానీం శృణుత హరకులం వేదకంఠోగ్ర కంఠౌ

శ్రీకంఠాన్నీలకంఠ: ప్రహసితవదన: పాతు న: చంద్రచూడ:

ఆ దు:స్థితి పగవారికి కూడ వద్దు

-->

ఆ దు:స్థితి పగవారికి కూడ వద్దు

డాక్టర్. చిలకమర్తి దుర్గాప్రసాద రావు.

అవి భోజమహారాజు రాజ్యం చేస్తున్న రోజులు. ఒక అభాగ్యుడు రాజదర్శనానికి వచ్చాడు. తన దు:స్థితి ఇలా విన్నవించుకున్నాడు. ఓ మహారాజా! మాది ఒక నిరుపేదకుటుంబం. ఎంతనిరుపేద కుటుంబమంటే మాటల్లో వర్ణింపలేనంత. కుటుంబంలో నేను నా భార్య ఒక పసిబిడ్డ మాత్రమే ఉన్నాం. ఇంటిలో తినడానికేమీ లేదు. తల్లికి తిండి లేకపోవడంవల్ల పిల్లవాడి కివ్వడానికి పాలు కూడ రావడం లేదు.  పసిబిడ్డ   ఆకలితో  అలమటిస్తున్నాడు.

అంతలో ఎవడో ' పేలాలండి పేలాలు ' అంటూ అమ్ము కోడానికి వీధిలోకి వచ్చాడు. గట్టిగా అరుస్తున్నాడు. పేలాలు కొందామా అంటే కొనడానికి ఇంట్లో చిల్లిగవ్వ లేదు. ఇక పిల్లవాడు ఆ పిలుపు వింటే కొనమని పేచీపెడతాడని భావించిన నా ఇల్లాలు లోలోపల బాధతో కుమిలిపోతూనే ఆ పిలుపు వినబడకూడదని బిడ్డ చెవులు గట్టిగా మూసేసింది . అసలే పసిబిడ్డ అందులో లేత చెవులు. విపరీతమైన నొప్పి పుట్టి గిలగిల్లాడిపోతున్నాడు . కాని నేను ఏమీ చెయ్యలేని పరిస్థితిలో ఉన్నాను. నాభార్యను మందలించలేను . అలాగని నివారించనూ లేను. ఆ సన్నివేశం నా గుండెల్లో ముల్లులా గుచ్చుకుని నన్ను ఇంకా బాధపెడుతూనే ఉంది.  నన్ను ఈ దురవస్థ నుండి తప్పించి మీరే రక్షించాలి మహాప్రభూ! అని దీనంగా మొఱపెట్టు కున్నాడు. రాజు అతని కుటుంబపోషణకు కావలసినంత ధనం ఇచ్చి పంపించాడు. ఎందుకంటే ఆ భోజుడు కవిజనపోషకుడే కాదు. దీనజన పోషకుడు కూడ. అంతటి హృదయవిదారకమైన సన్నివేశాన్ని కళ్లకు కట్టినట్లుగా వర్ణించిన ఈ రమణీయమైన శ్లోకం చూడండి.
अये लाजानुच्चै : पथि वचनमाकर्ण्य गृहिणी

शिशो: कर्णौ यत्नात्सुपिहितवती दीनवदना |

मयि क्षीणोपाये यदकृतदशावश्रुशबले

तदन्तश्शल्यं मे त्वमिह पुनरुद्धर्तुमुचित: ||

అయే లాజానుచ్చై: పథి వచనమాకర్ణ్య గృహిణీ

శిశో: కర్ణౌ యత్నాత్సుపిహితవతీ దీనవదనా

మయి క్షీణోపాయే యదకృతదశావశ్రు శబలే

తదంతశ్శల్యం మే త్వమిహ పునరుద్ధర్తు ముచిత: .

మెత్తవాణ్ణి చూస్తే మొత్తబుద్ధి

మెత్తవాణ్ణి చూస్తే మొత్త బుద్ధి

డాక్టర్. చిలకమర్తి దుర్గాప్రసాద రావు

సూర్యగ్రహణం కంటే చంద్రగ్రహణం ఎక్కువసార్లు వస్తుంది. దానికి గల కారణం శాస్త్రీయంగా అందఱికి తెలిసిందే. దానికి సాహిత్యపరమైన మఱొక కారణం కూడ ఉంది . అదేమిటో కొంచెం తెలుసుకుందాం.

దేవతలు రాక్షసులు కలిసి అమృతం కోసం హోరాహోరీగా పాలసముద్రాన్ని చిలికారు. ముందుగా కాలకూటవిషం వచ్చింది. అది శివుడికి అంటగట్టారు. ఆ తరువాత ఎన్నెన్నో విలువైన వస్తువులు వచ్చాయి. అందఱు ఎవళ్లకిష్టమైనవి వాళ్లు దక్కించుకున్నారు . సరే ఆ విషయం అలా ఉంచుదాం.

చిట్ట చివరికి వారు కోరుకున్న అమృతం లభించింది. దేవతలకు అసలైన అమృతం దక్కాలని రాక్షసులకు దక్కకూడదని ముందే నిర్ణయం జరిగింది. రాక్షసులు ఒకవరుసలోను దేవతలొకవరుసలోను నిలబడి ఉన్నారు . పంపకాల కార్యక్రమం మొదలయ్యింది. జగన్మోహినీ రూపంలో ఉన్న విష్ణువు దేవతలకు మంచి అమృతాన్ని రాక్షసులకు కల్తీ అమృతాన్ని పంచుతున్నాడు. దేవతల కుతంత్రం గమనించిన రాహువు దొంగచాటుగా వచ్చి దేవతల వరుసలో దూరాడు .ఇది గమనించిన సూర్యచంద్రులు ఆ విషయాన్ని జగన్మోహినీ రూపంలో ఉన్న విష్ణుమూర్తికి తెలియజేశారు. కాని విష్ణువు తగిన చర్య తీసుకునే లోపుగానే అమృతం వాడి చేతుల్లో పడడం వాడు ఒక్క గుక్కలో త్రాగేయడం కూడ జరిగిపోయింది. విష్ణువు వెంటనే వాడి తలనరికేశాడు. కాని అప్పటికి అమృతం గొంతుకుదిగి క్రిందికి రాకపోవడంతో తల సజీవంగా ఉండిపోయింది. మొండెం చచ్చి పోయింది .

నాటినుండి వాడు సూర్యచంద్రులిద్దరి మీద పగబట్టాడు. ఆ పగచల్లారలేదు. నాటినుండి నేటి వఱకు కొనసాగుతూనే ఉంది. సమయం దొరికినప్పుడలా మ్రింగడానికి వస్తూ ఉంటాడు. విచిత్రమేమిటంటే సూర్య చంద్రు లిద్దఱు సమానంగానే తప్పు చేసినా రాహువు చంద్రుణ్ణి బాధించినంత ఎక్కువగా సూర్యుణ్ణి బాధించడంలేదు. దానికి కారణం ఏమిటా అని ఆలోచిస్తే మెత్తగా ఉండడమే కారణం అని అంటాడు మాఘుడు తన 'శిశుపాలవధ' అనే మహాకావ్యంలో. సూర్యుడు తీక్ష్ణంగా కర్కశంగా ఉంటాడు. అతనంటే అందఱికి భయమే. చంద్రుడలా కాదు. మృదుస్వభావం. అందువల్ల అందఱికి అతనంటే లోకువే.

' తుల్యేపSరాధే స్వర్భాను:

భానుమంతం చిరేణ యత్

హిమాంశు మాశు గ్రసతే

తన్మ్రదిమ్న:ఫలం స్మృతం'

రాహువు, తనకు జరిగిన ద్రోహంలో సూర్య చంద్రులిద్దరు సమానంగా బాధ్యులే ఐనప్పటికి

చంద్రుణ్ణి బాధించినంత ఎక్కువగా సూర్యుణ్ణి బాధించడు . దీనికి కారణం చంద్రుడు మెత్తని వాడు కావడమే

ఈ విధంగా శాస్త్రీయ సత్యానికి సాహితీ సౌరభం జతచేసిన మాఘుని ప్రతిభ అసదృశం.

నీకంటే నాలుగాకులెక్కువే చదివాను

నీ కంటే నాలుగాకులెక్కువే చదివా

డాక్టర్. చిలకమర్తి దుర్గాప్రసాద రావు

౩/౧౦౬,ప్రేమనగర్, దయాల్బాగ్ ,ఆగ్రా.

పూర్వం గ్రంథాలు తాటియాకులపై వ్రాసేవారు. అందువల్ల తెలివైన వాళ్లని నాలుగాకులు ఎక్కువ చదివినవాడని అనేవారు. సరే ఆ సంగతలా ఉంచుదాం. శ్రీ కృష్ణునికి చాల మంది భార్యలున్నారనే విషయం మనందరికి తెలిసిందే. గోపికాకృష్ణుల ప్రేమ అమలిన శృంగారానికి ( platonic love) ఒక చక్కని ఉదాహరణ . అందుకే శ్రీ జాషువ కృష్ణుణ్ణి వర్ణిస్తూ :

' పదియాఱువేల గోపస్త్రీలతోగూడి

యపవాదు నెఱుగని యందగాడు' అంటారు.

ఆయనకు అందరు సమానమే అయినా సత్యభామకు కృష్ణుడు తన స్వంతం అనే భావన ఉంది. ఎప్పటికప్పుడు తన చెప్పుచేతల్లో ఉంచుకుని తనచుట్టు తిప్పుకుంటో ఉంటుంది. ఒకనాడు కృష్ణుడు సత్యభామ ఇంటికి తొందరగా వెళ్లవలసి ఉంది. కాని ఎందుకో చాల ఆలస్యమై పోయింది. ఆమె కూడ ఆయన రాకకు వేచి వేచి విసిగి వేసారి పోయింది. అసలే ఆమె కోపంలో దూర్వాసమహర్షికి చెల్లెలని చెప్పుకోవచ్చు. ఆమె కోపం తీవ్రస్థాయికి చేరుకుంది. అతను వచ్చి ఎంత అరిచి గీపెట్టినా తలుపు తీయనే తీయకూడదనే నిర్ణయానికొచ్చేసింది. ఆమె మెల్లగా నిద్రలోకి జారుకుంది. అంతలోనే కృష్ణుడు వచ్చాడు. తలుపు కొట్టాడు. వినిపించినా వినబడనట్లు నటించింది. ఆయన తలుపులు బాదుతూనే ఉన్నాడు. ఆమె సహనం కోల్పోయింది. తలుపు తీయకుండనే లోపలనుంచి

' తలుపుకొడుతున్నదెవరు?

( అంగుళ్యా క: కవాటం ప్రహరతి?) అంది.

వెంటనే 'ఓ కుటిలమైన దానా నేను మాధవుణ్ణి ( కుటిలే మాధవ: ) అన్నాడు. 'మాధవ' అనే పదానికి కృష్ణుడు అనే అర్థంతో బాటు వసంతుడు అనే అర్థం కూడ ఉంది. వసంతుడంటే మన్మథుని స్నేహితుడు చాల తుంటరివాడు. సత్యభామ ఆ అర్థం తీసింది. అయితే నువ్వు వసంతుడువా (కిం వసంత: )అంది. కృష్ణుడు గతుక్కుమన్నాడు. ఎలాగో సంభాళించుకున్నాడు.

వెంటనే కాదు నేను చక్రిని చక్రం ధరించిన వాణ్ణి (నో చక్రీ) అన్నాడు. వెంటనే ఆవిడ అయితే నువ్వు కుమ్మరివాడివా?( కిం కులాల:?) అనడిగింది.

కుమ్మరి వాడి దగర కూడ చక్రం ఉంటుంది కదా ! ఈ సమాధానం ఆయన ఊహించనే లేదు. వెంటనే ఆమెతో 'నేను భూమిని మోసినవాణ్ణి (న హి ధరణిధర: ) గుర్తు పట్లేదా!' అన్నాడు . అవును ఆయన వరాహావతారమెత్తి భూమిని మోయడం జగద్విదితమే కదా ! ఆమె గుర్తుపట్టి తలుపుతీస్తుం దనుకున్నాడు. కాని పని జరగలేదు. ' అయితే రెండునాలుకలున్న పామువా' ( కిం ద్విజిహ్వా ఫణీంద్ర: ) అంది. అవును మరి ఆది శేషువు కూడ భూమిని మోశాడు కదా . అందుకే అలా అంది . సరేలే ఎప్పుడో వరాహావతారసమయంలో జరిగిన విషయం కదా! గుర్తుపట్టి ఉండదు. ఇప్పటి కృష్ణావతారంలో జరిగిన విషయం చెబితే పని జరుగుతుందనుకున్నాడు . ' నేనే, గొప్ప పాముని ( కాళియుని) మర్దించినవాణ్ణి ( నాహం ఘోరాహిమర్దీ) గుర్తుకు రాలేదా అన్నాడు. ఓహో అదా సంగతి అటైతే నువ్వు గరుత్మంతుడివన్న మాట ( కిముత ఖగపతి: ) అంది. నిజమే మరి గరుత్మంతుడు కూడ పాముల్ని చంపుతాడుగా. అలా దెబ్బకొట్టింది. సరే ఈ డొంకతిరుగుడెందుకు. తిన్నగా తన పేరే చెప్పడానికి నిర్ణయించుకున్నాడు. నేను గరుత్మంతుణ్ణి కాదే, హరిని ( విష్ణువుని) అన్నాడు. ఈసారి తలుపు తీయడం ఖాయం అనుకున్నాడు. కాని అప్పుడు కూడ ఎదురుదెబ్బే తగిలింది. ఈయన దురదృష్టమో అదృష్టమో తెలియదు గాని హరి అనే పదానికి కోతి అనే మరొక అర్థం కూడ ఉంది. వెంటనే సత్యభామ అతనితో ' అటైతే నువ్వు కోతివా ? అంది.

కృష్ణుడు మరేమీ మాట్లాడలేకపోయాడు. ఇప్పుడు కూడ కృష్ణుని కంటే నాలుగాకులెక్కువే చదివిన సత్యభామనే విజయం వరించింది. ఈ విధంగా సత్యభామ గమ్మత్తైన మాటలకు చిత్తుగా ఓడిపోయిన కృష్ణమూర్తి మనందరిని రక్షించుగాక అని ఒక కవి ఈ అద్భుతమైన శ్లోకం వ్రాశాడు. శ్లోకం కూడ చదవండి మరి.

అంగుళ్యా: క: కవాటం ప్రహరతి ? కుటిలే! మాధవ: ,కిం వసంత: ?

నో చక్రీ , కింకులాల: ? నహి ధరణి ధర:, కిం ద్విజిహ్వా ఫణీంద్ర: ?

నాSహం ఘోరాహి మర్దీ , కిముతఖగపతి:? నో హరి:, కింకపీంద్ర: ?

ఇత్యేవం సత్యభామాప్రతివచనజిత: పాతు న: చక్రపాణి: