అందఱూ గొప్పవారే

అందఱూ గొప్పవారే

డాక్టర్. చిలకమర్తి దుర్గాప్రసాద రావు

ఒక వ్యక్తి ఏదో పనిమీద పొరుగు దేశానికి వెళ్ళాడు. ఆ దేశంలో తనకెవ్వరు తెలియక పోవడం చేత వసతి కోసం కొంత సమాచారాన్ని సేకరించవలసిన అవసరం ఏర్పడింది. అంతలోనే  ఒక బ్రాహ్మణుడు దారిలో ఎదురయ్యాడు.  వారిద్దరి మధ్య సంభాషణ ఈ విధంగా సాగింది.

బాటసారి: ఓ బ్రాహ్మణుడా! ఈ నగరంలో   ఎవరైనా ఉన్నతులున్నారా?

బ్రాహ్మణుడు: ఎందుకులేరండి! తాడిచెట్ల సమూహం ఉంది. అవి చాల ఎత్తుగా ఉంటాయి.

 బాటసారి:    దాత ఎవరైనా ఉన్నారా?

బ్రాహ్మణుడు: ఎందుకు లేరండి . చాకలి ఉన్నాడు . ప్రొద్దుటే గుడ్డలన్నీ తీసుకెళ్ళి ఉతికి  రాత్రికల్లా తెచ్చి ఇచ్చేస్తాడు. ఆయనొక్కడే మహాదాత .

బాటసారి: పోనీ ఈ ఊళ్లో పండితులేవరైనా ఉన్నారా?

బ్రాహ్మణుడు: ఎందుకు లేరండి . పరుల భార్యలను, ధనాన్ని కాజేయడంలో అందరు పండితులేనండి.

బాటసారి : ఓ మిత్రుడా ! ఈ ఊళ్లో ఎలా బ్రతుకుతున్నావయ్యా ?

బ్రాహ్మణుడు : నేనా ! విషక్రిమిన్యాయంగా బ్రతుకుతున్నాను స్వామీ! విషంలో పుట్టిన క్రిమిని ఆ విషం ఏమీ చెయ్యలేదు . బురదలో పుట్టిన కప్పని ఆ బురదేమీ చెయ్యలేదు. నేను విషంలో క్రిమిగా  బ్రతికేస్తున్నా .

 విప్రాస్మిన్నగరే మహాన్  కథయ క: ? తాళద్రుమాణాo గణ:

 కో దాతా? రజకో దదాతి వసనం ప్రాతర్గృహీత్వా నిశి

కో విద్వాన్ ? పరదారవిత్తహరణే సర్వేsపి విద్వత్తమా:

కస్మాజ్జీవసి హే సఖే ! విషక్రిమి న్యాయేన జీవామ్యహం    

                                                ******