వేగ బ్రోవ రమ్ము వేంకటేశ!

వేగ బ్రోవ రమ్ము వేంకటేశ!

                                                                   చిలకమర్తి వేంకట సూర్యనారాయణ

నరసాపురం

1. సీసము:-  చుట్టాలు హితులును| చొరవగా దరిజేరి

                                      ధైర్యము చెప్పెడి|తరుణమందు

               వైద్యపు౦గవులిచ్చు| హృద్యౌషధంబులు

                                   కంఠ౦బు దిగనట్టి | కాలమందు

              మర్మంబు లెఱిగింప | మాటాడయత్నించి

                                    విఫలమై శోకించు | వేళలందు

               పాశాన శమను౦డు | ప్రాణాలు గొంపోవ

                                       నిర్దయుడై చెంత | నిలుచు నాడు

ఆ|| వె|| నిన్ను శరణు వేడ నెట్లుందునో  నాడు

          నాటికిపుడె గొనుము నాదు మనము

          కాలయాపనంబు గావింపకోస్వామి!

           వేగ బ్రోవ రమ్ము వేంకటేశ|

2. సీసము:- తిరుమలేశుని నామ| దివ్యమంత్రమ్మును

                      చిత్తశుద్ధిగ జపము| చేయువారు

               ఏడు కొండలనెక్కి |యింపుగా నీమూర్తి

                   కనువిందుగా వేగ | గాంచువారు

                   అమ్మలకమ్మయౌ | నలివేలుమంగకు

                  సాష్టాంగవందనాల్  | సలుపువారు

                  కడు భక్తితో స్వామి | కళ్యాణసేవను

                  విభవము మీర గా|వించువారు

ఆ|| వె||  జగతిలోన సర్వసౌఖ్యాల తులతూగి

            ఇష్ట సిద్ధులొంది యిహమునందు

            సజ్జనాళి వలన సన్నుతులందుచు

            నిన్ను చేరుకొనుట నిశ్చయంబు 

3. ఆ|| వె|| ఏడు గిరులపైన నింపుగా సతులతో

              నిండు సౌఖ్యమందు నీకు పరుల

             బాధలెట్లు తెలియు పంకజనాభుడా!

             వేగ బ్రోవ రమ్ము వేంకటేశ!

4. ఆ|| వె|| నీవె దిక్కటంచు  నిశ్చల భక్తితో

               చిత్తమందు పూజ చేయు నాదు

              మొరలు వినవదేల ముక్కంటి ప్రియసఖ !

               వేగ బ్రోవ రమ్ము  వేంకటేశ!

5. ఆ|| వె||  నాదు మనసు నందు నక్కిన రిపులను

                పాఱద్రోలి వేగ భయము బాపి

               నిన్ను గాంచునట్టి నిశ్చలతత్త్వంబు  

               వేగ మొసగి బ్రోవు వేంకటేశ!