తారలతో తారాశశాంకం

తారలతో తారాశశాంకం

చిలకమర్తి. దుర్గాప్రసాద రావు

dr.cdprao@gmail.com

పద్యం వ్రాయడం సులభం కావచ్చునేమో  గాని నియమనిబంధనలచట్రంలో బిగించి పద్యం వ్రాయడo మాత్రం అనుకున్నంత  సులభమేమీ కాదు. కాని కవి ప్రతిభా వంతుడైతే  ఎటువంటి నిబంధనలు అడ్డం రావు. ఒక చోట కవిపండితసభ జరుగుతోంది . ఎంతోమంది కవులు పండితులు పాల్గొన్నారు . ఒక పండితుడు కొన్ని నియమనిబంధనలు  విధించి వాటికి లోబడి తాను కోరిన ఇతివృత్తాన్ని వర్ణిస్తూ  ఒక  అందమైన   పద్యాన్ని చెప్పమని కవులను కోరాడు.

ఆ నియమాలేమిటంటే:

౧. పద్యమంతా నక్షత్రం అనే పదమే ఎక్కువగా ఉపయోగించాలి.

౨. ఆ పదం ఏ అర్థంలో ప్రయోగించినా  అది ఒక నక్షత్రాన్ని సూచిస్తూనే ఉండాలి .

౩. ఆ పద్యం  ఒక నక్షత్రం కథను సమగ్రంగా వివరించాలి .

  ఒక కవి ఇలా వెంటనే ఆశువుగా చెప్పాడు .

నక్షత్రము పేరిటి చెలి

నక్షత్రసుఖంబు గోరి నక్షత్రములో

నక్షత్రమునకు రమ్మని

నక్షత్రము పట్టి యీడ్చె నక్షత్రేశున్

      

నక్షత్రేశున్ అంటే చంద్రుణ్ణి అని అర్థం. నక్షత్రము పేరిటి చెలి అంటే తార. తార  అంటే  నక్షత్రమే కదా ! నక్షత్రసుఖంబు గోరి అంటే ‘ఆశ్లేష’ ( కౌగిలింత ) సుఖంబు గోరి అని అర్థం . ఆశ్లేష అనేది ఒక నక్షత్రమే . నక్షత్రములో అంటే ‘చిత్తం’లో ( మనస్సులో) అని అర్ధం . చిత్త కూడ ఒక నక్షత్రమే . నక్షత్రమునకు రమ్మని  అంటే ‘మూల’కు రమ్మని అని అర్థం. నక్షత్రాల్లో మూల కూడ ఉంది. నక్షత్రము పట్టి యీడ్చె అంటే ‘హస్త’ము ( చెయ్యి ) పట్టుకుని లాగిoదట. హస్త కూడా ఒక నక్షత్రమే.

మొత్తం మీద ఈ పద్యం యొక్క భావమేమిటంటే  తార అనే ఒక నాయిక తన మనస్సులో సంగమసౌఖ్యాన్ని కోరుకొని మూలకు రమ్మని చంద్రుని చెయ్యి పుచ్చుకు లాగిoదట. ఇదే తారలతో తారాశశాంకం.  

                            ***************************