ఆర్యాశతకం--2

శ్రీ అప్పయ్యదీక్షితులు రచించిన

ఆర్యాశతకం

డాక్టర్. చిలకమర్తి దుర్గాప్రసాద రావు

            ఒక భక్తుడు తన స్త్రీలౌల్యాన్ని ఎంత గొప్పగా సమర్ధించు కు౦టున్నాడో స్వయంగా చూడండి . ఓ పరమశివ! నేను స్త్రీల కడగంటి చూపులకు ఓడిపోయి వారికి వశం అయ్యానని నన్ను ఎందుకు చులకన చేస్తున్నావు ? ఎందుకు నన్ను హీనంగా చూస్తున్నావు ? నీ శరీరంలోనే సగం నీ భార్య నిండి ఉండడం చేత నువ్వు ఆమెను చూడలేకపోతున్నావు. నీకా అనుభవం లేదు . ఒకే ముఖంలో ఉన్న ఒక కన్ను మిగిలిన వాటిని  చూడ లేదుకదా! శివశివ ! నిన్ను చుస్తే జాలేస్తోంది . నీకా అనుభవం  బొత్తిగా లేదు కదా పాపం. ఆ రసికత్వం తెలియని నువ్వు “ వీడు  స్త్రీల కడకంటి చూపులకు లొంగిపోయాడు” అని నన్ను ఆక్షేపిస్తున్నావు . నేను కేవలం వాళ్ళ కడగంటి చూపులకు మాత్రమే  లొంగిపోయినవాణ్ణి నువ్వలా కాదు స్త్రీని శరీరంలోనే దాచుకుని భరిస్తున్నవాడివి. నువ్వు నన్ను ఆక్షేపించడం చాల హాస్యాస్పదంగా ఉంది కదూ .

 లలనాలోలవిలోకన జితమిత్యవమన్యసే కథం మాం  త్వం

త్వయి జాయార్ధశరీరే శివ శివ నాలోకనానుభవ: (9)

త్వం = నువ్వు

లలనాలోలవిలోకనజిత౦ = (వీడు) స్త్రీల యొక్క చంచలమైన చూపుల చేత ఓడి౦పబడినవాడు

ఇతి = అని

మాం= నన్ను

కథం= ఎట్లు

అవమన్యసే= చులకనగా చూస్తున్నావు  

జాయార్ధశరీరే = శరీరంలో సగం భార్యయే గలిగిన 

త్వయి = (నీయందు) నీకు

శివ శివ = ఓ శివ శివ  (జాలితో)

ఆలోకనానుభవ:= చూడడంతోఅనుభవం 

న= లేదు

><><><