12. పూర్వమీమాంసా దర్శనంలో అద్వైతభావాలు.

 

12. పూర్వమీమాంసా దర్శనంలో అద్వైతభావాలు.

(శంకరకింకరులు)

అనువాదం :- డాక్టర్. చిలకమర్తి దుర్గాప్రసాదరావు 

పూర్వమీమాంసాదర్శన ప్రవర్తకులు జైమిని మహర్షి. పరస్పర విరుద్ధంగా కనిపిస్తున్న లేదా ఆభాసిస్తున్న వేదవాక్యాలను సమన్వయం చెయ్యడానికి,   సందేహనివృత్తి చేస్తూ  వేదవాక్యాల అర్ధాన్ని వివరించడం ద్వారా  యజ్ఞయాగాది క్రతువులకు ప్రేరేపించడమే  ప్రధాన ప్రయోజనంగా ఈ శాస్త్రం వెలువడింది.  . కానీ  ప్రవక్తలు అంతటితో ఆగలేదు. ఎందుకంటే ఏ యాజ్ఞికుడు  తాను చేసిన యజ్ఞాలకు తగిన ఫలం తానే అనుభవించడానికి అవకాశం లేకపోతే యాజ్ఞికవిధుల పట్ల ఆసక్తి కనబరచడు.

అలాగే ఏ సోమయాజీ  యజ్ఞం పూర్తయిన వెంటనే సాక్షాత్తుగా స్వర్గం చేరుకోలేడు. అందువల్ల వారు దేహం , మనస్సు, ఇంద్రియాలకంటే అతిరిక్తమైన ఆత్మయొక్క అస్తిత్వాన్ని అంగీకరించి తీరాలి.

ఇక జీవుని  స్వరూపం  రెండు విధాలు. ఒకటి- మన దైనందినజీవితంలోనున్న “నేను కర్తను”, “నేను భోక్తను” అనే అనుభవం . రెండు- వేదాంతులు చెప్పే సచ్చిదానంద స్వరూపమైన ఆత్మతత్త్వం . కుమారిలభట్టు ఈ రెంటిని కూలంకషంగా విశ్లేషించి నిజమైన ఆత్మతత్త్వం తెలుసుకోడానికి వేదాంతమతాన్ని ఆశ్రయించి తీరవలసిందే అన్నారు.

కుమారిలభట్టు ఆత్మను యజ్ఞకర్మ

ఫలాలనుభవించే  కర్తృత్వ , భోక్తృత్వ విశిష్టమైనదిగా వర్ణిస్తూ యజ్ఞయాగాది  కార్యకలాపాలు నిర్వహించడానికి , ధర్మాచరణకు వేదాంత ప్రతిపాదితమైన ఆత్మతత్త్వజ్ఞానం అనావశ్యకమేకాక, ప్రతిబంధకం కూడ ఔతుందని  అభిప్రాయపడ్డారు. (Br.సూత్రం. ఉపమార్డం చ 3-4) అది కుమారిల భట్టు అభిప్రాయంగా మీమాంసలోనే మరొక శాఖకు చెందిన ప్రభాకరమిశ్రులవారి  మాటలద్వారా వెల్లడౌతోoది.

‘నేను’ ‘నాది’ అనేవి ఆత్మపైన ఆరోపించ బడిన మిథ్యారూపమైన భావనలే. ఇది సత్యం . ఇందులో ఎటువంటి సందేహంలేదు. కాని ఇవి సర్వసంగ పరిత్యాగులైన సన్యాసులకే వర్తిస్తాయి. అందుకే  పరమపుజ్యులైన కృష్ణ  ద్వైపాయనులు కూడ అజ్ఞానులై కర్మాచరణ అచేస్తున్నవారి మనస్సులను ఎవ్వరు విషపూరితం చెయ్యకూడదని (న బుద్ధి భేదం జనయేదజ్ఞానాం కర్మసంగినామ్)  గట్టిగా కట్టడి చేశారు.   

                 <><><><><>